Текті адам арзан әнге құмартпайды
BAQ Майра ІЛИЯСОВА, ҚР еңбек сіңірген әртісі, «Майра» продюсерлік орталығының жетекшісі:
Кезінде Күләш Байсейітовадай қазақтың бұлбұл әншісін «чудо» деп атаған Ғабит Мүсірепов болатын. Сіздің өнердегі 30 жылыңызға орай өткізгелі жатқан кешіңізді «Қазақтың Майрасы» деп атаған да, бәлкім, қазақтың бір зиялысы болар?
– Қызық болды өзі. Дүниеге сәби келсе де, әдемі есім іздеп шарқ ұратын халықпыз ғой. Сондықтан кеш өткізерде де қалай атарымды білмей, біраз ойланғаным рас. Қали Сәрсенбай деген қазақтың сондай бір зиялы азаматын танымайтын жұрт аз шығар. Сол кісімен бір мерекеде дастарқандас болғанымыз бар еді, сонда мен есіктен кіріп келіп едім, «қарсы алыңыздар, қазақтың Майрасы келді» демесі бар ма?! Басында аса мән бере қоймап едім, біраздан соң тағы «орталарыңызда қазақтың Майрасы отыр» десе, үшінші рет тағы «қазақтың Майрасын ортаға шақырамын» деді. Сонда ғана мен «әй, мына теңеу қандай керемет өзі, мені қазақтың Майрасы деді ғой» деп ойланып қалдым. Сондай білімді азамат, қазақтың білдей бір тұлғасы айтты ғой деп, өзімнің осы 30 жылдық халыққа есеп беру кешімді де «Қазақтың Майрасы» деп атауды жөн көрдім. Одан артық қандай атақ керек әншіге?! Кештің сценарийін де белгілі қаламгер Қали Сәрсенбей жазды.
– Ең алғаш ел алдына қандай әнмен шығып едіңіз, есіңізде бар ма? Сол бір кез бен бүгінгіңізді салыстырсаңыз, не өзгеріс байқайсыз, яғни бұрын кім едіңіз, қазір кім болдыңыз, өз пайымдауыңызша?
– Ең алғаш сахнаға 1978 жылы шықтым. Ол кезде 1-курс студенті едім. Әлі есімде, «сені «Гүлдермен» бірге концертке алып кетейін деп тұрмыз» деп, дәрісте отырған жерімнен алып кеткен болатын. Қазақ мемлекеттік опера және балет театрында өткен сол бір үлкен концертте Дінмұхаммед Қонаев сынды қазақтың ардақ тұтар тұлғасының отырғаны күні кешегідей көз алдымда. Егер сол күннен бастап есептесек, әрине, 30 жылдан асады, бірақ өзім соны дөңгелектеп алуды жөн көрдім. 20-дан жаңа асқан кезде алғаш орындаған әнім Кенен Әзірбаевтың «Ой, жайлауы» болатын, әрине, есімде. Содан соң Нұрғиса Тілендиевтің «Аралдағы жеңеше-айы», сосын халық әні «Бір келіншек», міне, осылар болатын. Сол әндерімді орындаған «Майра Ілиясова ән шырқайды» деген фильм-концертім Алтын қорда сақталған болуы керек. Ал енді салыстыру жағына келсек, ол Майра мен бұл Майраның арасы жер мен көктей. Ол Майра жас, албырт, әннің де бірін түсінсе, бірін түсінбеуі мүмкін. Қанша дегенмен, өнердің де, өмірдің де базарына енді ғана кіріп келе жатқан кез ғой. Ал қазір қандай ән орындасам да, алдымен оның сөзін, әнін ой елегінен өткізіп аламын әбден. Орындағанда да философиялық толғауға беріліп дегендей... Алайда сол кездегі кереметім деп жастығымды айтуға болатын шығар. Жастықпен біраз қателік жасап, өнер жолында біраз адасып барып, қайта өз орнымызды тапқан да тұсым бар...
– 30 жыл деген – шынында, адамның бір есеп берер шағы. Осы ретте сіз «адастым» деп нені меңзеп тұрсыз, толығырақ тоқталасыз ба? Бір өкінішіңіз бар секілді ме?..
– Жоғарыда айтқан концертте бойымда жылт еткен бір сәуленің барын бірінші болып байқап, «Майражан, қалқам, әжептәуір үнің бар екен, бірақ әндерің аздау» деп маған өз бағасын берген – қазақтың біртуар азаматтарының бірі, Халық әртісі Хадиша Бөкеева апамыздың жары Байғали Досымжанов. Бірақ менің бір өкінішім – балалық па, шалалық дейміз бе, сол кісінің берген телефонын жоғалтып алып, хабарласа алмай қалғаным. Өнер адамдары өзі бала секілді таза, бала секілді сәл нәрсеге өкпелегіш келеді ғой, ағамызды аздап ренжітіп алдым ба сол кезде деп ойланып кетемін кей-кейде... Екінші бір өкінішім: 1979 жылы эстрада және цирк колледжін 30 әнші бітірсек, соның екеуін ғана Алматыда алып қалды. Соның бірі – мен, екіншісі – Ақбота Керімбекованың анасы, белгілі әнші Бибіажар Махамбетова. Ол кезде Алматыда қалу деген сондай бір қиындықпен, мемлекеттік комиссияның қатаң сынағынан өтіп барып қол жеткізетін толағай табыс болатын. Бірақ соншалық сыннан өтіп, әнші болып, Алматыда қалғанымда ол жолмен жүрмей, марқұм ұстазым Кәукен Кенжетаевтың шақыруымен осы бүгінгі Т.Жүргенов атындағы академия, сол кездегі театр және көркем сурет институтына түстім де кеттім. Ол жерде менің дәстүрлі әнге нағыз бейімделген табиғи дауысымды бұзып, классикалық дауыс үлгісін қойып берді. Соның салдарынан, шыны керек, өзімді-өзім таба алмай қалған кезім болды. Соған өкінемін. Сонда әлі өзіме не керек екенін, өзімнің нағыз дарынымды салмақтай алмағаным болып тұр ғой. Ата-анамыз да «жоғары білім алу керек» деген соң, «қалайда сол студияның білімімен қалмауым керек» деген ой болды.
– Сонда сіз актрисасыз да ғой, солай ма?
– Иә, дипломым бойынша мен «әнші-актрисамын». Бізді классикалық ән саласында оперетталар орындауға бейімдеді. Сонымен, қазақы домбырам қалып қойды, өзімді-өзім таба алмай қалған кездерім болды дегенім сол. Сосын «Сазген» фольклорлық ансамбліне кірген уақытта қайтадан өзімді таптым. Бірақ осы екі ортада Қайрат Байбосынов ағамыз көпке дейін маған өкпелеп жүрді. Сол жылдары, есімде, ағамыз мені көріп қалды да, тоқтатып алып: «Неге домбыраны тастадың? Бірден филармонияда жұмыс істеуің керек еді», – деді. Мен де жұлып алғандай: «Аға, өзіңіз оқып жүрген кезімде бір рет те болса «сенен жақсы әнші шығады» деп мақтадыңыз ба?» – дедім. Сонда ұстазымыздың әдейі бетке мақтамағаны болып тұр ғой, біз жақсы оқысын, алға ұмтылған үстіне ұмтылсын деп. Жастық шақта осындай бір қателіктеріміз болған азды-көпті. Алайда Т.Жүргенов институтына түспегенімде мен Рахилям Машуров, Кәукен Кенжетаевтай ұстаздарым мен Роза Рымбаева, Гүлбаушан Тілеубекова, Әсел Мәмбетова сынды курстастар таппас едім. Сондай-ақ сахна мәдениетін, мәдени ортада өнер адамының өзін ұстауымен қатар, ұстаздық қасиеттерді де үйрендім. Сан-саққа кетіп барып, өзімді тапқаныма Құдайға шүкір деймін.
– Киноға түсуге ұсыныс жасалды ма немесе өзіңізде актриса болу деген арман болды ма? Бәлкім, бүгінде көрермен әнші Майрамен қатар, актриса Майраны көріп қалар ма еді?
– Жоқ, көзімнің анық жеткені: мен актриса емеспін. Адам өз шамасы мен қалауын біліп, мойындауға тиіс. Мойындамау – бүгінде өнерде жүрген жастарымыздың ең көп қателікке бой алдырып қана қоймай, уақыты мен абыройын жоғалтуына соқтырып жатқан дерт. Дипломдық жұмыста тәп-тәуір ойнап шығып, актриса деген мамандық алып, театр мен киноны жақсы көрсем де, мен өз жолымды ол саладан көрген жоқпын. Мен әншімін. Сондықтан ешқашан да тіпті бір сәтке болса да «мен мынадай рөл сомдай алмадым-ау» немесе «маған ешкім кинодан рөл ұсынбады» деп өкінген емеспін. Егер қайта туып, қайта таңдау жасау мүмкіндігі берілсе, ойланбастан әншілікті таңдар едім.
– Неге әншінің бірі өседі де, екіншісі өшеді? Өз әншілік тәжірибеңіз бойынша осыған жауап бере аласыз ба?
– Әншінің бақыты да, соры да – репертуар таңдай білуде. Өзінің дауысына сай ән таңдай білген әнші өседі де, көрінген әнді айта салған әнші мазаққа айналады. Репертуар таңдай білу деген – түйсіктің, өренің ісі. Ол, әрі-беріден алғанда, адамға генмен берілетін тектілікке байланысты.
– Білімге де байланысты ма осы? Бүгін, мысалы, кәсіби маман еместер басып алды ғой сахнаны. Сіз соған не дейсіз?
– Жоқ, оған онша қосылмаймын. Тек деп тұрмын ғой, мысалы, кезінде Әміре, Ақан, Біржан сынды әншілерімізге кім диплом берді? Олар – тума таланттар. Сондай-ақ олар ақылды, ең бастысы, текті еді. Текті адам ешқашан арзан әнге құмартпайды. Бір күндік арзан ән үшін тегін сатып, абыройсыздыққа ұрынбайды.
– Арзан ән дегеніміз қандай, қымбат дегеніміз ше, сіздіңше?
– Қымбат ән дегеніміз – ақылды ән. Халықтың жүрегіне жететін ән. Ғасырдан-ғасырға ұмытылмайтын ән. Ол – сені жылататын, күлдіретін, ойландырып, толғандыратын ән. Ол – сені ерекше бақытқа кенелтетін, репертуарыңнан ешқашан түспейтін, ешқашан сұраныстан қалмайтын ән. Мәселен, «Гауһартас» пен «Бұлбұл» Бибігүл Төлегенова апамыздың 60 жыл репертуарынан түспеген. Міне, тектілік деген – сол!
– Ресейлік әншілер репертуарындағы әр әнді өз өміріне байланысты таңдап, соны жан-жүрегімен орындағандықтан, бірден-ақ тыңдарман жүрегін жаулап алатын сияқты. Ал біздің қазаққа осы жағынан үлгі алу керек пе? Мәселен, сіздің өз ішкі жан дүниеңізде болып жатқан құбылыстарды ән арқылы халыққа сездіргіңіз келер ме еді?
– Келісемін. Тектілік, ақылды әнші деп отырғаным да – сол. Егер сіз қайғылы бір халық әнін орындауыңыз керек болса, өз басыңнан сондай бір мұңды өткермесең, оны сезінбейсің, сондықтан ол әнді халыққа жеткізе алмайсың да. Егер сенің сезімталдығың, тектілігің және де, әрине, орындаушылық шеберлігің болмаса, ол ән халыққа жетпейді. Бізде ақылды әншілер көп. Мысалы, Алтынай Жорабаеваны ақылды әрі текті әнші дер едім. Ақылды әншінің бірі – біздің Рамазан Стамғазиев. Ал енді осылардың барлығының басында тұрған әнші Мақпал Жүнісова дер едім. Мақпалдың тектілігі, Мақпалдың ән орындауы, Мақпалдың әнді жүрекпен орындауы – ол бір құбылыс. Бұл пікірді ешкімнен де именбей, қорықпай, ұялмай айта аламын. Мақпал әнді жеткізгенде тура жілік-жілікке бөліп, бейнебір бассүйегіңді ашып, миыңның да тамыр-тамырына құйып беретіндей... Жыласа да, шынайы жылайды, күлсе, шын жүрегімен күледі. Жасандылық онда атымен жоқ. Мақпалдың мықтылығы – сонда! Бұл менің кейбіреулерді бөлектеп, қалғандарын төменшіктеткенім емес. «Жақсының жақсылығын айт, нұры тасысын» деген қазақтың сөзі бар ғой. Ал мен қазақтың қызы, қазақтың Майрасымын. «Болар елдің баласы бірін-бірі батыр дейді» дегенді әрбір қазақ өзіне өмірлік ұстаным етсе дер едім.
– Ал енді өз жайыңызға оралсақ. Әншіліктен бөлек, сіздің бүгінде продюсерлік қырыңызды көріп жүрміз. Жылына бірнеше жоба түгіл, 10-15 жылда өткізетін өз концертін өзі ұйымдастыра алмайтын әншілеріміз бар ғой. Осы продюсерлікке қалай бел шештіңіз? Қазақта әлі ондай бір жол қалыптаспай тұрғанда жазықтан соқпақ салғандай қиын тиген жоқ па?
– Иә, мұныңыз рас. Менің өзіме «Майражан-ау, сен қалай жылына бірнеше жоба жасап үлгересің, кеш өткізу деген қиын екен ғой, көмектесші» деп қоңырау шалатын әріптестерім, достарым бар. Өзімді керемет продюсермін деп айтудан аулақпын. Дегенмен бір нәрсені айта аламын, продюсерлік – ұстаздықтан басталатын іс. Өзімді продюсер деп айтпаймын сондықтан, мен ұстазбын. Ал жас продюсерлер жайына келер болсақ, олардың көбі – заманға икемделіп, тәуекелмен жұмыс істеп жатқан іскер азаматтар. Өзі әу баста продюсер болайыншы деген адам емеспін, ата-аналардың өздері ән салатын балаларын жетектеп әкеліп, «сахнаға шығатын жол көрсетіңізші, орындаушылық өнерін шыңдауға көмектесіңізші» деп, солайша осы жолға қалай бел шеше кірісіп кеткенімді байқамай қалғанмын. Өйткені алдыма әкелген баланың әні ұнамайды, киген киімі, сахнада өзін-өзі ұстай білмейтініне қарап, жаным ашитын. Бесіктен белі жаңа шыққан бала махаббат туралы ән салады, сол дұрыс па, көрермен оны дұрыс қабылдай ма, жалпы, жас ұрпақ үшін ол дұрыс қасиет пе? Соның бәрін көргенде жаным ашып, соларды тәрбиелейтін ұстаз керек екенін түсіндім. Қолымнан келетін болған соң кірістім ғой.
– Жалпы, жақсы продюсер болу ақшаға байланысты ма?
– Ақша – продюсердің қолын байлайтын да, жолын ашатын құрал. Бірақ продюсер болу үшін жалғыз ақша жеткіліксіз. Мәселен, өзімді алсам, әрине, мультимиллионер емеспін. Ақшаны маған ешкім бермейді, еңбектеніп жүріп, бірінікін біріне жалғап, тауып жүрген жайымыз бар. Қаржым соншалық жеткілікті болмағандықтан да қазір жасап жатқан жобаларымның 30-40 пайызын ғана жүзеге асыра алып жүрмін. Ал егер маған осы ретте қаржы көздері табылса, онда ойымдағының 100 пайызын орындаудан күш-жігерімді, идеямды аямас едім. Мысалы, айталық, менің 60 мың долларға клип түсіргім келеді, бірақ «жомарттың қолын жоқ байлайды» дегендей ғой... Әйтсе де қазірдің өзінде 4-5 мың долларға арзан клип түсіріп, абыройды төгу өз алдына, халықтың талғамын арзандатып жүрген жоқпын деп ойлаймын. Сөздің реті келіп тұрғанда айта кетсем, Өзбекстанға барып, арзан дүниелер жасап жүрген әншілерімізге қарным ашады. Неге? Қазақ әнін айтып тұрып, ар жағынан ала шапанды шал, ала шапанды бала, өзбек қызын көрсетіп жатқанда жүрегім ауырады. Қазақ әнінде қазақ жүруі керек қой. Мейлі, ол кино болсын, клип болсын, қанша ақша беріп тұрсаң да, өзбек ағайынға «ала тақияңды шешіп, қазақтың бөркін ки» деңізші, олар клипке түспейді. Клипмэйкерлер де өздерінің алдына барып тұрған соң, қазақтарға өз шартын қоя алады, себебі олар бізге ақшаға жалданып тұрса да, өз шартын қояды. Пұл көрсетсең, құл болып кете салмайтын олардың сол қасиетіне риза болуымыз керек. Бірақ одан өзімізге неге үлгі алмаймыз? Неге қазақ бір клипті арзан жасатуға бола неге болсын көне салады?! Осыған мән беретін, намысымызды қайрайтын кез жетті емес пе?! Жан-жағымызға қарайықшы, өзбек ұлтжанды, қырғыз ұлтжанды, түркімен ұлтжанды. Ал біз еліктегіш халықпыз, ащы да болса, шындық – бұл. Көзіммен көріп жүрген соң айтып тұрмын. Өз басымыздың қамын ұлттың жанынан артық санап кетеміз, менің соған жүрегім ауырады. Менің бірде-бір тобым Өзбекстанға барып, клип түсірген емес. Бірнеше тобым болса да, соның ішінде «Еркенің» ғана екі клипі бар. Әрине, басқа да топтарыма клип түсіргім келеді, бірақ оған дайындық болып, қаржы жетпеген соң, арзан екен деп, «ағаш түбіне екі өзбекті қойып», соған «клип түсірдім» деп, Алашымның алдында абыройымды түсіргім келмейді. Ал жақсы клип түсірген топтар мен әншілерді жоғары бағалаймын, сыйлаймын. Бұл жағынан Қыдырәлінің еңбегін жоғары бағалаймын.
– Кейінгі кездері, байқадыңыз ба, қазақ эстрадасында классикалық стиль мен эстраданы ұштастыратын квартеттер мен квинтеттер пайда болды. Бұл ненің белгісі? Жалпы, қуануымыз керек пе бұған?
– Классика – қай заманда да классика, құны жоғары сала. Дегенмен де сіз айтып отырған топтар – соны заманға бейімдеп, сахнаға сол арқылы аздаған жаңалық әкеліп жатқандар. Алмас Кішкенбаев құрған «Классик», Сәкен Майғазиевтің «Парасаты» келді іле-шала. Мақсат Жәутіков құрған «Аңсар» тобы бар. Мен де «Асум» деген топты осы стильде құрдым. Бұл да – бір жағынан, жетістік, әншілеріміз өз аяқтарынан тұрып, енді өз жетектеріне бір-бір топ алатын жағдайға жетті деген сөз. Бірақ бір ұнамайтыны – бәрінің бір-біріне қатты ұқсастығы. Бір жағынан, бұл үрдісті құптаймын да. Неге? Себебі бүгін бізде операға баратын көрерменнің саны аз. Мәселен, таяуда телеарналардың бірінде Ресейде қойылған бір жас әншінің операсы жайлы айтып жатыр, оған билетті ел алдын ала жапа-тармағай талап кеткен. Себебі ол әнші өзге опера әншілеріндей итальянның дауыс қойылымымен орындамайды, өзінше, бастысы, жүрекпен айтатын көрінеді партияларды. Ал бізде – біріншіден, қатып қалған итальянша орындау үрдісі, ол бір деп қойыңыз. Екіншіден, жасы ең кемі 35-40-тан асып кеткен әйелдер 16 жастағы қыздың рөлін сомдап, соның партиясын салады. Опера театрында қазір 18 жастағы әнші бар ма? Жоқ. Операға халық бармайды деп режиссерлер өкпелеп жатады, оның ең бірінші себептері осылар деп ойлаймын. Екіншіден, біз бұл салада осыдан бір ғасыр бұрынғы жолмен әлі келе жатырмыз. Сондықтан опера жанрын эстрадаға бейімдеу, бір жағынан, халықты сол театрға дайындау да болып табылады. Маған тағы бір ұнамайтын жайт: қазір эстрадада топ-топ әнші көбейді. Егер ол топтағы төрт әнші төрт дауыста шырқаса, ол керемет болар еді. Бізде олай емес, үш сопрано, үш тенор, үш баритон, үш альт болып, 6-8-ден шығып жатады. Бұл кәсіби тұрғыдан алып қарағанда өте бір дөрекі көрініс дер едім. Осыдан кейін халықтың неге кейінгі кезде эстрада әншілеріне көңілі толмайды десек, ізденіс жоқ, кәсіби көркемдік жоқ, яғни қимыл-қозғалыс жоқ, киім киіске дұрыс көңіл бөлінбейді, дауысы бір-бірінен аумайды, сосын халық жалықпай қайтеді?! Қарапайым халық түгіл, музыкадан хабары бар менің өзім кім орындап жатыр, кімнің дауысы екенін айыра алмаймын. Кейінгі кезде «Заман», «Серілер», Ерболат Құдайбергеновтер ерекше көзге түсіп жүр, себебі ешкімге ұқсамайды.
– Осы соңғы үш-бес жыл көлемінде жас әншілеріміз, тіпті қазақ эстрадасындағы орыстілді әншілердің өздері де халық әніне көше бастады. Қуануға болатын шығар, мүмкін, бірақ әлгілердің көбінің орындауындағы қазақ әнінің сиқын көріп, езуіңізді тез-ақ жиып, қабағыңызды түйіп, қазақ ретінде намысыңыз оянады. Неге? «Әжептәуір ән еді, пұшық айтып қор қылды» дегеннің сиқы. Сөзі түсініксіз, ал әуені – мүлдем басқа ырғақ, басқа иірім, тіпті әр жол, әр буын сайын милизм қосып, дауысты дірілдетіп, ыңырсытып, әйтеуір, қазақтың әнін барынша батыстық стильде жеткізгенде қазақтың төбе шашы тік тұрардай жиіркенішті ән пайда болады. Біз қалай қарап отырып, қазақ әнін қорлата бермекпіз? Тыйым салуға болмай ма осыған?
– Қазақылықтың жоқтығында ғой, тек қана тілде емес, ділде жоқ. Шетелдің әнін тыңдап, соны жақсы, ал ата рухы бар әнді архаизм көретін бүгінгі менталитеттің жеткізген жері – осы. Бұған тыйым салу керек, әрине, бірақ біз ол түгіл, фонограммамен орындаудың өзімен талай жыл алысып, жеңе алмай келеміз ғой. Осы таяу болашақта арнайы заң күшіне еніп, фонограммамен орындауға тыйым салынады деп жатыр. Сол кезде сұрыпталар, әйтпесе қазір кім көрінген сахнаны баса көктеп, эфирді жаулап алды. Себебі шешетін – ақша. Біз де бір нәрсеге қол жеткіздік: бұдан былай Алматыдағы Республика сарайында кім көрінген концертін қоя алмайды.
– Ол жерде концерт беретін әнші қандай талапқа жауап беруі керек ендігіде?
– Кәсіби білімі бар және сол биік кәсіби дәрежеде әнді жақсы орындайтын, сахналық костюмдері соған сай, сцеанарийі сақадай сай әншілер ғана ол жерде өз кешін өткізе алады. Қытайдың көйлегі мен қытай етігін кие салып, арзан әнімен алып сарайдың сахнасына шығып кетуге мүлдем жол берілмейді. Өйткені киім мәдениеті, ән таңдау, орындау шеберлігі – осының барлығы сахна мәдениетін құрайды. Бізде бұл соңғы жылдары ең төменгі дәрежеге дейін құлдырап кеткен болатын.
Құлаққағыс
Бүгін сағат 19:00-де Алматы қаласындағы Республика сарайында белгілі әнші, «Майра» продюсерлік орталығының продюсері, ҚР еңбек сіңірген әртісі Майра Ілиясованың «Қазақтың Майрасы» атты мерекелік ән кеші болады. Қазақтың ән мен жырына сусындаған халықты осы кештің қонағы болуға шақырамыз. Майра Ілиясованың өзі және кейінгі кездері әншінің қолдауымен өнерге келген «Серілер», «Ерке», «Асум» т.б. жас топтармен қатар, қазақ эстрадасының белгілі әншілері қатысатын кештен қапы қалмаңыздар!
i-news.kz